ch. 1
Ag.1.1
Agesilaus Lacedaemonius cum a ceteris scriptoribus tum eximie a Xenophonte Socratico collaudatus
est: eo enim usus est familiarissime.
Ag.1.2
hic primum de
regno cum Leotychide, fratris filio, habuit contentionem. mos erat enim Lacedaemoniis a maioribus
traditus, ut binos haberent semper reges, nomine magis
quam imperio, ex duabus familiis Procli et Eurysthenis,
qui principes ex progenie Herculis Spartae reges fuerunt.
Ag.1.3
horum ex altera in alterius familiae locum fieri
non licebat: ita suum utraque retinebat ordinem. primum ratio habebatur, qui maximus natu esset ex
liberis eius, qui regnans decessisset; sin is virile secus
non, reliquisset, tum deligebatur, qui proximus esset
propinquitate.
Ag.1.4
mortuus erat Agis rex, frater Agesilai:
filium reliquerat Leotychidem. quem ille natum non
agnorat, eundem moriens suum esse dixerat. is de
honore regni cum Agesilao, patruo suo, contendit neque id quod petivit consecutus est.
Ag.1.5
nam Lysandro
suffragante, homine, ut ostendimus supra, factioso et
iis temporibus potente, Agesilaus antelatus est.